قالك مره فى وحده تنوض فى ولدها قالتله نوض الخدمه قللها خلينى نرقد شويا قالتله نوض يعطيك كيا..قال:ان شاء الله معها موبايل

التلميذ قال لابلته نحبك يا أبلة ونبي نتزوجك!!!!!!!تزرطت (أحرجت) الابلة وقالته: انا ما نحبش الأولاد الصغار!!!!! قاللها عادي حتى انا مش مستعجل على الصغار

واحد بطنه توجع فيه مشي لدكتور باكستاني سأله الدكتور : لاباس عليك ..
ردعليه : والله يا دكتور واكل هندي(يعنى تين شوكى) .. الدكتور سيبه وهرب

في واحد شري خروف العيد,,, روح بيه للحوش ولما بينزله من السيارة قعد ينادي يا جمعة يارجب ياخليفة يا مسعود… قاله الخروف تباهي شهدرت بيا توا ننزل بروحي

فيه ابلة تشرح للطلبة درس الاتحاد قوة امشي نوضت طالب اسمه ابو
عجيلة ..قالت توا بنعطو لي بوعجيلة عصى وحدة بكسرها ,,طربق بوعجيلة
العصى,,قالت توا بنعطو ابو عجيلة عصاتين مع بعض,, طربق بوعجيلة
العصاتين ,,,بعدين قالت توا بنعطو بوعجيلة الحزمة كلها ما يقدرش
ايكسرها ,,,امش طربق بوعجيلة الحزمة كلها,,,قتـتله افلقــت الدرس يا
بوعجيلة

سحانين مدايرين زردة جو الباسطي والمالفي والبكلاوة كلو كلو وبعدين صار فيها اللبز اللي يحدف بباسطي واللي بمالفي واحد منهم حدفوه ببكلاوة
طاح ساخ جوه جماعته إنوضوا فيه بعد ماناض قالوله
سني يارازل طحت من طرف بكلاوة ؟ قاللهم ماهو دربتوها من زيهة اللوزة

غبي امشي لدكتــور نفسي ,, قاله الدكتور خيرك ,, قاله و الله مش عارف يا دكتور الناس ديما ايقوللي يا كلب ,, يا كلب ,, قاله الدكتــور من امتى الكلام هذا ,, قاله من لما كنت جرو

في طالب قالت له الابلة جيب بــوك .. امشي جي بوه قال لي الابلة خيره
ولدي ,, قالت له ولد خروف غبي ما يعرف شي,., قال لها
كيف ولد ذكي ,, قالت نسأله سؤال كان جاوب ولدك ذكي ,, قالت للولد برا
دور عليا لوطى ,, امشي الولد دور دور و ارجع،،ـ قاللها يا ابلة دورت
عليك في المسرح و حجرة المدرسات ما القيتكش ,, اتلفت له بوه و يضربه
كف .. قال له تي برا شوفها في الادارة يا حمــــار

واحد كان يلبس رقم 40 في حذاءه ثم أصبح يلبس بعد 5 دقائق 36 اعلاش؟ قصّ أظافره

وانبطح الحمار وغردت الزرافه وطار الفيل فوق الشجره واجتمع الاحبه الاسد والغزال ونهقت الحمامه وطربت العصافير ورقص القرد مع الديك غبي يحاول يكتب قصص اطفال

في رجباني و يباني تعاركو ,, امشي اليباني اضرب الرجباني
ارقد في المستشفى ثلاث ايام بعدها جاه قاله شنو الحركة هادي
قاله اليباني حتى تيكواندو,,, المهم امشي الرجباني اتمرن و جي
اتعاركو مرة تانية ,, اليباني اضرب الرجباني ارقد في المستشفى ثلاث
ايام ,, بعدها جاه قاله شنو الحركة الجديدة ,, قاله اليباني حتى هيا
كاراتي ,, امشي اتمرن الرجباني و جي .. اتعاركو مرة ثالثة,, الرجباني
اضرب اليباني رقده في العناية ثلاث شهور .. بعدها جي اليباني قاله ما
اتقوليش شنو الضربة هادي... قاله هادي لا تيكواندو لا كاراتي ,, حتى هوا
كـــريك هونداي

واحد اعمى ماشي للعرس ارفع مع ولده قاله كان الجماعة يأكلو بسرعة
انخصني باش الحقو معاهم,, امشي الاعمي عكس مع جماعة بدالي و هابي ,,
اقعد ياكل بسرعة الولد اتحشم ابدي ينخص في بوه ,, و الشيابني طايح ليه
ليه و الولد بنخص,, امشي الشايبني لوح الكاشيك
و قام الصونية ,, قاللهم تي غيـــر صلو على النبي يا جماعة بشوية

واحد مشي يزور في خالته خضرا لقاها يابسة.

مرة واحد إمشي بيخطب .. امشي جابتلة البنت طاسة شاهي كيس امشي قام الورقة امتع شاهي الكيس .. وقلها شني ابنبدوا في جو السحر من توى

واحد طاح من فوق الحيط قالوله جاتك سليمة قاللهم قوللها اتخش
المربوعة توا انجي

واحد مسطول يزوق في حوشهم , خش عليه بوه قاله فرش جرايد تحتك يا ولدي, قاله عادي يابوي حتى هكي نلحق .؟

غبي صايم اتصل على الليبية - fm قالوا: له شن تحب تسمع.. قاللهم: مقطع من أذان المغرب.

مراءة ليبية امشت من سيربح المليون امشي علقت في سؤال طلبت استعانة
بصديقة,,اتصل جورج قرداحي :الوو اخت فاطمة ,,معاك جورج قرداحي من
برنامج من سيربح المليون ,,قتله و النبي سكر من غير اتســهويك

واحد قال لمرته اليوم نبي رومانسية ..امشيت لامها قالتلها:شن هيا الرومانسية الام:مش عارفه بس نقعي الرز على الاحتياط

مرة فى واحد نوضه الأستاد قاله شن إسمك قاله المبرى على المبرى قاله قول مبرى من الجهتين وخلاص

مرة فيه شاب مرخي يسوق في سيارة وطلع في الأحمر .. لحق عليه الشرطي
بالموطو وقال له بعصبية : ليش طلعت في الأحمر؟ رد الشاب بخوف : والله انا لما
طلعت ما كانش أحمر هلبة .. يعني تقدر تقول نص نص.

واحد اشري سرير جديد ارقد تحته اعلاش؟ لانه ميكانيكي

سكــرا صلى بروحه فاتته ركــــــعة

وحده غبيه صقعانه قربت من النار باش تتدفأ .. بعدها قالت : الله لايحرمنا منها دنيا.. وآخرة

واحد ماشي لحديقة الحيوان .. جي جنب قفص الأسد وخشش دماغه في القفص ..
جي الحارس متاع الحديقة يصيحله من بعيد : أنتا يا راجل يا مجنون شنو تدير ..
طلع دماغك من قفص الأسد .. الراجل: غير خيرك خايف عليه .. تقول بناكلوه.